LIFE TALKS - ஒரு இண்டரெஸ்ட்டிங் ஆன சம்பவம் !

   

 

    நிஜ வாழ்க்கையில் நடந்த ஒரு வியக்கத்தக்க உயிர் பிழைத்தல் கதையை தெரிந்துகொள்ள வேண்டும் மக்களே. 1966-ஆம் ஆண்டு, டோங்காவில் உள்ள ஒரு கத்தோலிக்க பள்ளியில் பயின்ற ஆறு மாணவர்கள், தங்கள் வாழ்க்கையில் ஏற்பட்ட சலிப்பினால் அங்கிருந்து தப்பித்து பிஜி நாட்டிற்குச் செல்ல முடிவெடுத்தனர். ரகசியமாக ஒரு படகைத் திருடி கடலுக்குச் சென்றபோது, எதிர்பாராதவிதமாக ஒரு பெரிய புயல் தாக்கியதில் அவர்கள் படகு சிதைந்து, ஆள் அரவமற்ற "அட்டா" (Ata) என்ற பசிபிக் தீவில் சிக்கிக் கொண்டனர். உணவு, குடிநீர், தங்குமிடம் என எதுவுமே இல்லாத சூழலில், அவர்கள் தங்கள் உயிர் பிழைப்பிற்கான போராட்டத்தைத் தொடங்கினர். இந்தச் சூழலில் அந்த மாணவர்கள் காட்டிய ஒற்றுமையும், விடாமுயற்சியும் வியக்கத்தக்கது. விரக்தியில் முடங்கிவிடாமல், அவர்கள் அந்தத் தீவை ஒரு சமூகமாக மாற்றினர். நெருப்பை மூட்டுவது, அதை அணையாமல் பாதுகாப்பது, மழைநீரைச் சேமிப்பது, தேங்காய் மற்றும் மீன்களை உணவாகக் கொள்வது எனத் தங்கள் தேவைகளைத் தாங்களே பூர்த்தி செய்து கொண்டனர். உடற்பயிற்சி செய்யத் தேவையான கருவிகளைத் தாங்களே தயார் செய்து கொண்டனர். அவர்களில் ஒருவனுக்குக் கால் உடைந்தபோது, மற்ற ஐவரும் ஒன்றிணைந்து அவனை அன்புடன் கவனித்து குணப்படுத்தினர். எவ்வித நவீன வசதிகளுமற்ற அந்தத் தீவில், 15 மாதங்கள் எந்தப் பெரிய தகராறுமின்றி அவர்கள் வாழ்ந்தனர் என்பது நம்பமுடியாதது. ஒருநாள், அந்தப் பகுதியைத் தாண்டிச் சென்ற பீட்டர் வார்னர் என்ற ஆஸ்திரேலிய மீனவர், தீவிலிருந்து புகை வருவதைக் கண்டு அருகில் சென்று பார்த்தபோதுதான், அங்கே ஆறு இளைஞர்கள் ஒரு சமூகமாக வாழ்வதைக் கண்டு அதிர்ந்தார். நவீன சரஸ்வதி சபதம் படத்தில் வருவது போன்ற ஒரு சூழலை நிஜத்தில் அந்த இளைஞர்கள் உருவாக்கியிருந்தனர். இந்த மீனவர் அவர்களைக் காப்பாற்றி மீண்டும் உலகிற்கு அழைத்து வந்தார். இந்தப் போராட்டம் நமக்கு ஒரு கேள்வியை விட்டுச் செல்கிறது: உங்களையும் உங்கள் நண்பர்களையும் இது போன்ற ஒரு தீவில் விட்டால், உங்களால் உயிர் பிழைத்து, ஒரு சமூகமாக வாழ முடியுமா?