LOVE TALKS - பொதுவாக உருவாகும் குறைகள் !

 

ஆண்களின் ஆகப் பெரிய பலவீனமே அவர்களின் ‘கண்கள்’தான். ஒரு பெண்ணின் வெளித்தோற்றத்தைப் பார்த்த உடனே, அவளது குணம் என்ன, பின்புலம் என்ன, அவளோடு நம்முடைய அலைவரிசை ஒத்துப்போகுமா என்ற எந்தவொரு அடிப்படை அறிவும் இல்லாமல், "ஆகா... இவள்தான் என் தேவதை!" என்று விழுந்துவிடுவது இவர்களின் மரபணுவிலேயே எழுதப்பட்ட சாபம்.

அறிவியல் ரீதியாக இதை ‘ஹாலோ எஃபெக்ட்’ (Halo Effect) என்பார்கள் அதாவது, ஒரு பொருள் பார்க்க அழகாக இருந்தால், அது எல்லாவற்றிலும் சிறந்ததாகத்தான் இருக்கும் என்று மூளை தப்பாகக் கணக்கு போடுவது. இந்த ஒரு நிமிட ‘அட்ராக்ஷன்’ போதைக்காகத் தங்களின் ஒட்டுமொத்த உழைப்பு, நிம்மதி, எதிர்காலம் என எல்லாவற்றையும் பணையம் வைத்துவிட்டு, தெருவில் வந்து நிற்பதே பல ஆண்களின் வாடிக்கையாகிவிட்டது.

மறுபுறம், பெண்களின் ஆகப் பெரிய பலவீனம் ‘அட்டென்ஷன்’ (Attention) எனப்படும் மற்றவர்களின் கவனிப்பைத் தேடுவது. "நான் எப்படி இருக்கிறேன்?", "உலகம் என்னை எப்படிக் கொண்டாடுகிறது?" என்ற அந்த ஒரு சிறு அங்கீகாரத்திற்காக அவர்களின் மனம் எப்போதும் ஏங்கிக் கொண்டே இருக்கும். இதைப் புரிந்து கொண்டுதான் இன்றைய இன்ஸ்டாகிராமும், பன்னாட்டு நிறுவனங்களும் ‘லைக்ஸ்’ (Likes) மற்றும் ‘கமெண்ட்ஸ்’ (Comments) மூலம் பில்லியன் டாலர் வர்த்தகத்தையே நடத்திக் கொண்டிருக்கின்றன. 

காதலில் கூட, ஒரு ஆண் தன் மீது காட்டும் அந்த ஆரம்பக்கால ‘அதீத அக்கறை’ (Love Bombing) என்ற போலி அட்டென்ஷனில் மயங்கி, அவன் எவ்வளவு பெரிய ‘டாக்ஸிக்’ ஆள் என்று தெரிந்தும், பெண்கள் அவனிடம் தங்களை முழுமையாக இழந்துவிடுகிறார்கள். தன் ஆன்மாவை விட, தனக்குக் கிடைக்கும் அந்த தற்காலிகக் கவனிப்பே பெரிது என்று நம்புவது இவர்களின் பலவீனம்.

ஆண்களின் ‘அட்ராக்ஷனும்’, பெண்களின் ‘அட்டென்ஷனும்’ வெறும் தண்ணீரில் தோன்றும் நீர்க்குமிழிகள். இவற்றால் உங்கள் வாழ்க்கைக்கு ஒரு பைசா பிரயோஜனம் கூடக் கிடையாது.

இதை உணராத காதலர்கள், இந்த இரண்டு போலி உணர்வுகளுக்காகத் தங்களின் சுயமரியாதை, இளமை, மன அமைதி மற்றும் பொருளாதாரத்தை அடியோடு இழந்துவிடுகிறார்கள். ஆண்களே... ஒரு பெண்ணின் வெளித்தோற்றத்தைக் கடந்து அவளது ‘பக்குவத்தை’ மதிக்கப் பழகுங்கள். பெண்களே... மற்றவர்களின் தற்காலிக ‘அட்டென்ஷனை’ விட உங்களின் ‘சுயமரியாதையையும் தற்சார்பையும்’ முதன்மையாகக் கருதுங்கள்.

இந்த இரண்டு பலவீனங்களையும் கடந்து, எவன் ஒருவன் தன் வாழ்க்கையின் நிஜமான இலக்கை நோக்கி ஓடுகிறானோ... அவனுக்கு முன்னால் இந்த உலகமே மண்டியிடும் என்பதுதான் காலத்தின் இறுதித் தீர்ப்பு!