LOVE TALKS - கொஞ்சம் அறிவியல் கொஞ்சம் காதல் !

 

நாம் ஒருவரைப் பார்த்தவுடனே, "அவள் கண்கள் என்னை ஈர்த்தன", "அவன் புன்னகை என் இதயத்தைத் திருடியது" என்றெல்லாம் கவிதை எழுதுவது அப்பட்டமான பொய் என்கிறது நவீன அறிவியல். 

காதலின் உண்மையான தொடக்கம் நம் மூக்கில்தான் நிகழ்கிறது. மனித உடலில் இருக்கும் MHC (Major Histocompatibility Complex) எனப்படும் மரபணுத் தொகுப்பு, நம்முடைய நோய் எதிர்ப்புச் சக்தியைத் தீர்மானிக்கிறது. 

பரிணாம அறிவியலின்படி, நம்முடைய மரபணுவில் இருந்து முற்றிலும் மாறுபட்ட, ஒரு வலுவான நோய் எதிர்ப்புச் சக்தி கொண்ட இணையையே நம் ஆழ்மனம் தேடுகிறது. அப்போதுதான் பிறக்கும் குழந்தைக்கு நோய் எதிர்ப்புச் சக்தி அதிகமாக இருக்கும் என்பது நம் முன்னோர்களின் ‘ஜெனடிக் வியூகம்’.

நாம் ஒருவரை நெருங்கும்போது, அவரது உடலில் இருந்து வெளிப்படும் கண்ணுக்குத் தெரியாத வேதி மூலக்கூறுகளை (Pheromones) நம் மூக்கு ரகசியமாக மோப்பம் பிடித்து, "பாஸ், இவரோட ஜீன் நமக்கு செட் ஆகும், காதலை ஆரம்பிங்க!" என்று சிக்னல் கொடுக்கிறது. 

அதாவது, நீங்கள் ‘ஆத்மார்த்தமான காதல்’ என்று நினைப்பது, உண்மையில் உங்கள் மூக்கு நடத்திய ஒரு அதிநவீன பயோ-மெட்ரிக் மரபணுப் பரிசோதனை மட்டுமே! இந்த சயின்ஸ் நிறைய பேருக்கு தெரியாது !

காதலின் ஆரம்பக் கட்டத்தில் நம் மூளையில் டோபமைன் (Dopamine) மற்றும் நோர்பைன்பிரைன் (Norepinephrine) ஆகிய ஹார்மோன்கள் அன்லிமிட்டடாகச் சுரக்கும். இது ஒரு கியூட்டான அறிவியல் காரணம் மக்களே !

இந்த நேரத்தில் தான் உலகமே அழகாகத் தெரியும், தூக்கம் வராது, பசி எடுக்காது, காதலியின்/காதலனின் எல்லா டாக்ஸிக் குணங்களும் ‘கியூட்’ (Cute) ஆகத் தெரியும். ஆனால், இந்த ‘ஹார்மோன் போதைக்கு’ ஒரு காலாவதித் தேதி (Expiry Date) உண்டு என்று எச்சரிக்கிறது நரம்பியல் அறிவியல் (Neuroscience).

துல்லியமாகக் கணக்கிட்டால், இந்த வேதியியல் புயல் அதிகபட்சமாக 2 முதல் 3 ஆண்டுகள் மட்டுமே நீடிக்கும். அதற்குப் பிறகு மூளை இந்த போதைக்கு பழகிப்போய், இயல்பு நிலைக்குத் திரும்பிவிடும். 

சினிமாக்கள் இதோடு சுபம் கார்டு போட்டுவிடுவதால் நமக்கு உண்மை தெரிவதில்லை. இந்த 3 ஆண்டுகளுக்குப் பிறகுதான், "அவன் ஏன் இப்படி மாறிவிட்டான்?", "அவள் ஏன் எப்போதும் கத்துகிறாள்?" என்ற நிஜ உலகப் பிரச்சனைகள் ஆரம்பிக்கின்றன. 

இந்த வேதிப்பொருள் சுழற்சியைப் புரிந்து கொள்ளாதவர்கள், "காதல் குறைந்துவிட்டது" என்று விவாகரத்து நோட்டீஸை நோக்கி ஓடுகிறார்கள்

ஆரம்பகாலக் காதல் என்பது இயற்கை நமக்குக் கொடுக்கும் ஒரு தற்காலிக ‘மயக்க மருந்து’ (Infatuation). அந்த வேதிப்பொருள் போதை குறையும் போதுதான், உண்மையான உறவின் அஸ்திவாரம் தொடங்குகிறது.

அந்தத் தற்காலிக ஈர்ப்பு மறைந்த பிறகு, ஒரு உறவு நிலைத்து நிற்க வேண்டுமானால் அங்கே டோபமைனுக்குப் பதிலாக ஆக்ஸிடோசின் (Oxytocin) எனப்படும் ‘பிணைப்பு ஹார்மோன்’ (Attachment Hormone) சுரக்க வேண்டும். 

அது பரஸ்பர மரியாதை, தோழமை, மற்றும் ஆழமான புரிதலால் மட்டுமே சாத்தியம். எனவே, காதலின் ஆரம்பகால ரசாயனப் போதையை மட்டும் நம்பி உங்கள் வாழ்க்கையின் ஒட்டுமொத்தப் பங்குகளையும் முதலீடு செய்யாதீர்கள். 

இருவருக்கும் ஈர்ப்பு குறைந்த பிறகு, எதிரே நிற்பவர் உங்கள் வாழ்நாள் தோழராக இருக்கத் தகுதியானவரா என்று சிந்திப்பதே ஒரு முதிர்ந்த மனிதனின் அடையாளம்!