LIFE TALKS - வாடகைக்கு வாங்குவது ஆளுமை அல்ல !

 

உலகம் உங்களை எப்படிப் பார்க்கிறது என்பதைப் பற்றிய கவலைகளை அடியோடு தூக்கி எறியுங்கள். திரைக்குப் பின்னால் (Behind the screen) நீங்கள் வாழும் அந்த நிஜமான, அமைதியான வாழ்க்கைதான் உங்களுக்கான உண்மையான சொத்து.

மற்றவர்களைக் கவர்வதற்காக உங்கள் நிம்மதியையும் பொருளாதாரத்தையும் பணையம் வைக்காதீர்கள். போலியான பிம்பங்களை உருவாக்குவதை நிறுத்திவிட்டு, உங்களின் தனிமையையும் எதார்த்தத்தையும் நேசிக்கத் தொடங்குங்கள். நூறு போலி லைக்குகளை விட, உங்கள் மன அமைதியுடன் நீங்கள் குடிக்கும் ஒரு கோப்பை தேநீர் அதிக மதிப்புடையது!

இந்த பிம்பக் கட்டமைப்பின் ஆகக் கொடூரமான முகம் என்னவென்றால், மனிதர்கள் தங்களுடைய தகுதியை விட பல மடங்கு அதிகமான ஒரு போலிப் பிம்பத்தை உலகிற்குக் காட்டுவதற்காகத் தங்களின் எதிர்காலப் பொருளாதாரத்தையே அடகு வைக்கிறார்கள். 

ஒரு குறிப்பிட்ட சொகுசு காரின் முன்னால் நின்று புகைப்படம் எடுப்பதற்காகவும், ஒரு பகட்டான இடத்திற்குச் சுற்றுலா சென்றதாகக் காட்டுவதற்காகவும் இன்று ‘இஎம்ஐ’ (EMI) மற்றும் தனிநபர் கடன்கள் (Personal Loans) அள்ளித் தெளிக்கப்படுகின்றன.

நீங்கள் வாங்கும் அந்த விலையுயர்ந்த ஆடை உங்களின் அழகைக் கூட்டுவதற்காக அல்ல; "நானும் இந்த உயர் அடுக்கைச் சேர்ந்தவன்தான்" என்று சமூகத்திற்கு நிரூபிக்கும் ஒரு பரிதாபகரமான முயற்சி. 

நாம் உழைத்துச் சம்பாதிக்கும் பணம் நம் கைகளில் தங்குவதே இல்லை; ஏனென்றால், இந்த போலிப் பிம்பப் பசியை ஊட்டி வளர்ப்பதற்கே நம் ஒட்டுமொத்த உழைப்பும் ‘வாடகையாகக்’ கொடுக்கப்பட்டு விடுகிறது. 

நிஜத்தில் காலியான வங்கிக் கணக்கோடு அமர்ந்துகொண்டு, டிஜிட்டல் திரையில் கோடீஸ்வரனைப் போலப் பாவனை செய்யும் ஒரு விசித்திரமான ‘வாடகை ஆளுமைச் சமூகமாக’ நாம் மாறிவிட்டோம்.