GENERAL TALKS - சொல்வதெல்லாம் உண்மை ?

 

தத்துவவாதிகள் மிக எளிதாக ஒரு தத்துவத்தைக் கூறிவிட்டுத் தங்கள் குளிரூட்டப்பட்ட அறைகளுக்குள் சென்று விடுகிறார்கள் "சாம்பலில் இருந்து எழும் பினிக்ஸ் பறவையைப் போல நீ மீண்டும் வருவாய்" என்று. கேட்க மிகக் கவர்ச்சியாக இருக்கும் இந்த வரிகளுக்குப் பின்னால் இருக்கும் கொடூரத்தை எவரும் சிந்திப்பதில்லை. சாம்பலாகிப் போவதற்குக் கீழே ஒரு மனிதன் அனுபவிக்கும் நரக வேதனையை அந்தத் தத்துவம் தந்திரமாக மறைத்துவிடுகிறது. 

கஷ்டப்பட்டு, தட்டுத்தடுமாறி, தன் சுயமரியாதையைக் கையில் பிடித்துக்கொண்டு அந்தச் சாம்பலில் இருந்து ஒரு மனிதன் மீண்டும் உயிர்த்தெழுந்து வரும்போது, அவனது கைகளில் இந்த உலகம் ஒரு சிம்மாசனத்தையோ அல்லது ஒரு மாபெரும் மகுடத்தையோ அல்லவா கொடுத்திருக்க வேண்டும்? 

அதை விடுத்து, "மிக நன்று தம்பி, நீ இப்போது இன்னும் பக்குவப்பட்டுவிட்டாய், வா... அடுத்த ரவுண்டு ஆப்பு உனக்காகக் காத்துக்கொண்டிருக்கிறது" என்று சொன்னால், அந்தப் பறவைக்கு ஏன் கோபம் வராது? நாங்கள் என்ன பிரபஞ்சத்தின் பரிசோதனைக் கூடத்தில் வாழும் வெள்ளை எலிகளா? படும் துயரங்களுக்கு நிகரான ஒரு பேரரசு எண்ட்கார்டில் (End card) அமையவில்லை என்றால், நாங்கள் பட்ட கஷ்டங்களுக்கு எந்தவொரு தார்மீக மரியாதையும் இல்லாமல் போய்விடும்.

வாழ்க்கை என்னும் அதிவேக நெடுஞ்சாலையில் (Highways) நாம் பயணிக்கும்போது, ஒவ்வொரு திருப்பத்திலும் இருக்கும் ‘டோல் கேட்டுகளில்’ நம்மிடமிருந்து வலியும் வேதனையும் மட்டுமே கட்டணமாக வசூலிக்கப்படுகிறது. நாம் செலுத்துவது சாதாரணக் கட்டணம் அல்ல; நம் இளமை, நம் மகிழ்ச்சி, நம் நிம்மதி ஆகிய அனைத்தையும் ‘பிரீமியம் கட்டணமாகக்’ கட்டிவிட்டுத்தான் மேலே நகர்கிறோம். 

இவ்வளவு விலையுயர்ந்த தொகையைச் செலுத்திய பிறகு, நமக்குக் கொடுக்கப்படும் அந்தச் சாலை எப்படி இருக்க வேண்டும்? கண்ணாடியைப் போல மின்ன வேண்டாமா? ஆனால், நமக்குக் கிடைப்பதோ ஏமாற்றங்களும், துரோகங்களும், குழிகளும் நிறைந்த ஒரு கரடுமுரடான பாதை மட்டுமே. இது என்ன மாதிரியான நிர்வாகம்? ஒரு நுகர்வோராக (Consumer) நின்று யோசித்துப் பார்த்தால், இது அப்பட்டமான ஏமாற்று வேலை. 

நாம் அழுது தீர்த்த ஒவ்வொரு சொட்டுக் கண்ணீருக்கும், இழந்த ஒவ்வொரு இரவுத் தூக்கத்திற்கும் மிகச் சரியான ‘கேஷ்பேக்’ ஆஃபராக ஒரு மாபெரும் வெற்றி நமக்குக் கிடைத்தே தீர வேண்டும். பிரபஞ்சத்திடம் நான் வைக்கும் இறுதிப் பிரகடனம் இதுதான்: "பில் தொகையை நான் முழுமையாகச் செலுத்திவிட்டேன், அதற்கான இறுதி வெகுமதியை உடனடியாகப் பார்சல் செய்து என் கைக்கு அனுப்புங்கள்; என் பொறுமைக்கு ஒரு எல்லையுண்டு!"