LIFE TALKS - உங்க வாழ்க்கையில் நிராகரிப்பா ?

 

   வாழ்வில் புறக்கணிப்புகளையும், தோல்விகளையும் சந்திக்கும்போது நாம் அதற்காக அதிகம் கலங்குவது இயல்புதான். ஆனால், சற்று யோசித்துப் பார்த்தால், நம்மைச் சுற்றியுள்ள ஒரு இருநூறு பேருக்கு அப்பால் இந்த உலகத்திற்கு நம்முடைய தோல்வியோ அல்லது வெற்றியோ பெரிய விஷயம் கிடையாது. நமக்குத் தெரிந்த அந்தச் சிறிய வட்டத்தைத் தாண்டிச் சென்றால், யாருக்கும் யாருடைய கஷ்டமும் பெரிதாகத் தெரியப் போவதில்லை; சொல்லப்போனால், "இதையெல்லாம் ஏன் வந்து என்னிடம் சொல்கிறீர்கள்?" என்றுதான் கேட்பார்கள். ஆதலால், ஏதேனும் ஒரு தோல்வி ஏற்பட்டால் அது அந்தச் சிறிய வட்டத்திற்குள் மட்டுமே சில நாட்களுக்குப் பேசப்படும். அதன் பிறகு, நாம் அடையப்போகும் ஒரு சின்ன வெற்றி அந்தத் தோல்வியின் தடங்களை முழுமையாக மறைத்துவிடும். எல்லாவற்றிற்கும் மேலாக, எந்தவொரு சூழ்நிலையிலும் நம்முடன் உறுதுணையாக நிற்பார்கள் என்று யாரையும் கண்மூடித்தனமாக நம்பி ஏமாறத் தேவையில்லை. பெரும்பாலோமானவர்கள் நம்மை வெறும் முகவரியால் மட்டுமே அறிந்தவர்கள்தானே தவிர, நிரந்தரமானவர்கள் அல்ல. ஆகையால், உண்மையான உறவுகளை நாம்தான் தேடிக் கண்டறிய வேண்டும்; நாமே அவற்றை உருவாக்கிக் கொள்ள வேண்டும். அப்படிப்பட்ட நிஜமான உறவுகள் எப்போதுமே நம்மை நம்முடைய தோல்விகளை வைத்து எடைபோட மாட்டார்கள்; நம்முடன் நின்று அரவணைத்துக் கொள்வார்கள்!