TECH TALKS - சோசியல் மீடியா ப்ரெஸன்ஸ் அவசியமானது !

 

   "நண்பர்கள் என்ன நினைப்பார்கள்?", "உறவினர்கள் நம்மைப் பார்த்து என்ன பேசுவார்கள்?" என்ற இந்தச் சமூகத்தின் முடக்கும் கேள்விகளை நினைத்துத் தயங்கிக் கொண்டே இருந்தால், உங்களால் இந்த நவீன உலகில் எதையுமே சாதிக்க முடியாது. மற்றவர்கள் போடும் முகமூடிகளுக்குப் பயந்து நம் கனவுகளுக்குநாமே விலங்கு மாட்டிக் கொள்ளக் கூடாது. சமூக வலைதளங்கள் மற்றும் டிஜிட்டல் உலகத்திலிருந்து முற்றிலுமாகத் தனித்து ஒதுங்கி வாழ்வது என்பது இன்றைய காலகட்டத்தில் எந்த வகையிலும் புத்திசாலித்தனம் அல்ல. தயக்கத்தைத் தூக்கியெறிந்துவிட்டு, இந்தத் தொழில்நுட்ப மாற்றங்களை ஏற்றுக்கொண்டு தைரியமாக முன்னோக்கிச் செல்வது மட்டுமே நமது இருப்பை உறுதி செய்வதற்கான ஒரே வழியாகும் மக்களே! ஐந்து அல்லது பத்து வருட அனுபவமும் முதிர்ச்சியும் உள்ள பலர்கூட, கேமரா முன்பு வந்து பேசுவதற்கோ அல்லது தங்களின் திறமையை ஒரு காணொளியாகப் பதிவு செய்வதற்கோ இன்றுவரை தயங்குவதைப் பார்க்க முடிகிறது. செல்போன்கள் மற்றும் சமூக ஊடகங்கள் அறிமுகமான ஆரம்பக் காலத்தில் இது ஏதோ ஒரு சிறு பொழுதுபோக்காகவோ அல்லது ஒரு தனித்து இயங்கும் துறையாகவோதான் பார்க்கப்பட்டது. ஆனால், இன்றைய டிஜிட்டல் யுகத்தில் யூடியூப், இன்ஸ்டாகிராம், ஃபேஸ்புக் போன்ற தளங்கள் நம் வாழ்வின் அறுபது சதவீதத்திற்கும் அதிகமான இடத்தைப் பிடித்துவிட்டன. இந்தச் சூழலில், இந்த இணைய உலகத்தில் நம்முடைய இருப்பு அல்லது பிரதிநிதித்துவத்தை (Representation) வழங்குவது என்பது விருப்பப்பட்டால் செய்யும் விஷயமாக அல்லாமல், தவிர்க்க முடியாத ஒரு கட்டாயமாகவே மாறிவிட்டது. 30 அல்லது 40 விநாடிகள் ஓடும் சிறிய ரீல்ஸ், பாட்காஸ்ட்கள், வெறும் வாய்ஸ் ஓவர் அல்லது பின்னணியில் கேம் பிளே ட்ரெய்லர் ஓடிக்கொண்டிருக்க இயல்பாகப் பேசும் முறைகள் போன்ற சின்னக் சின்ன முயற்சிகளிலிருந்து தொடங்குவது மேடை பயத்தையும் தயக்கத்தையும் உடைத்தெறிய மிகச் சிறந்த வழியாகும். இந்த ஸ்பாட்லைட்டிற்குள் நீங்கள் வந்தே ஆக வேண்டும்; அதற்காக உங்களை நீங்களே தயார்படுத்திக் கொண்டு, சரியான தருணத்தில் களமிறங்குங்கள். பல வருடங்களாக எழுத்துலகில் அனுபவம் வாய்ந்த ஒரு மூத்த வழிகாட்டியாக அடுத்த தலைமுறைக்கு நான் சொல்லும் மிக முக்கியமான அறிவுரை இதுதான் ஆனால், அதே நேரத்தில் உங்களைச் சமூக வலைதளங்களில் வெளிப்படுத்திக் கொள்ளும்போது அதீத கவனமும் எச்சரிக்கையும் தேவை. "சொன்ன சொல்லைத் திரும்பப் பெற முடியாது" என்ற பழமொழி போல, இணையத்தில் நாம் பதிவு செய்யும் ஒவ்வொரு வார்த்தையும் நிரந்தரமானது. எந்தவொரு கருத்தையும் பதிவிடும் முன்பே பலமுறை யோசித்துத் தெளிவுபெறுங்கள். வாழ்க்கையில் எப்போதும் மீட்டெடுக்கக்கூடிய (Reversible) தவறுகளைச் செய்யுங்கள், ஆனால் ஒருபோதும் மீட்டெடுக்க முடியாத (Irreversible) நிரந்தரத் தவறுகளைச் செய்துவிடாதீர்கள்! இந்த விழிப்புணர்வுடன் உங்கள் டிஜிட்டல் பயணத்தைத் தொடங்குங்கள், மக்களே.