GENERAL TALKS - சமூக ஊடகங்கள் சரியாக பயன்படுத்தப்பட வேண்டும்

சமூக ஊடகங்களின் தற்காலப் போக்கு ஆழ்ந்த கவலையையும் எரிச்சலையும் ஏற்படுத்துகிறது. ஒரு பணியை முழுமையாகவும் சரியாகவும் செய்து முடிப்பதை விடுத்து, வேண்டுமென்றே அதில் சிறு தவறுகளைச் செய்து, அதனை இணையத்தில் காணொளியாகப் பதிவிடுவதை இன்றைய காலத்தில் பலர் வழக்கமாகக் கொண்டுள்ளனர். காணொளியில் உள்ள அத்தவறைச் சுட்டிக்காட்டி மக்கள் தங்களது கருத்துகளைப் பதிவிடுவதன் மூலம், அந்தப் பக்கத்திற்கான பார்வையாளர்களின் எண்ணிக்கையும் ஈடுபாடும் பன்மடங்கு அதிகரிக்கிறது. பார்வையாளர்களின் கோபத்தைத் தூண்டி அதன் மூலம் கிடைக்கும் கவனத்தையும் வருமானத்தையும் இலக்காகக் கொண்ட இந்த உத்தி 'ரேஜ் பெய்ட்' என்று அழைக்கப்படுகிறது. எதிர்மறையான கருத்துகளையும் விவாதங்களையும் மட்டுமே அல்காரிதம்கள் முன்னிலைப்படுத்தும் சூழலில், இதுபோன்ற ஆரோக்கியமற்ற முறைகள் ஊக்கப்படுத்தப்படுவது வருந்தத்தக்கது. இத்தகைய வணிக நோக்கம் கொண்ட சூழலில், இணையம் எப்போது ஒரு ஆரோக்கியமான தளமாக மாறும் என்ற கேள்வி நம்முள் எழாமல் இல்லை. சமூக ஊடக அல்காரிதம்கள் (Algorithms) எப்போதுமே லைக்குகளை விட கமெண்ட்களை (Comments) மற்றும் ஷேர்களைத்தான் அதிகமாக முன்னிலைப்படுத்துகின்றன. ஒரு வீடியோவில் தவறு இருக்கும்போது, மக்கள் அதைச் சுட்டிக்காட்டி உடனடியாகக் கமெண்ட் செய்வார்கள்; மற்றவர்களுடன் விவாதிப்பார்கள். இது அந்த வீடியோவின் ரீச்சை பல மடங்கு அதிகரித்துவிடும். "கடைசி வரைக்கும் என்னதான் பண்றாங்கன்னு பார்ப்போம்" அல்லது "அந்தத் தவற்றை எப்போது திருத்துகிறார்கள்?" என்ற ஆவலில் மக்கள் வீடியோவை முழுமையாகப் பார்ப்பார்கள். இதுவும் அல்காரிதமுக்குச் சாதகமாக அமைகிறது. நேர்மறையான, பயனுள்ள மற்றும் கடின உழைப்பைக் காட்டும் நல்ல விஷயங்களை விட, இப்படிப்பட்ட எரிச்சலூட்டும் தவறுகளுக்கே இணையத்தில் அதிக வரவேற்பும் விளம்பர வருமானமும் கிடைக்கின்றன. இது படைப்பாளிகளைச் சரியான வழியை விட எளிமையான, தவறான வழிகளைத் தேர்ந்தெடுக்கத் தூண்டுகிறது.